تــــقـــــاوى

[علي الخطيب]

السلام عليكم ,,,

عودة بعد غياب ,,, ولكن هالمرة بالجديد ,,,

تستاهلون يالغالين ,,,

الاهداء ,, الى نايف ... استاذي !

يقول :



مشاوف .. وناب الشعر .. مابه حروف
بعض القصايد .. لا ازبنت .. بنت آوى

تدوج .. في وسط المحاني .. وانا اشوف
وتخلف جروحٍ .. بالحشا .. ما اتداوى

يا ليت انا مرّت .. على بعضي .. ظروف
يوم اني كلي .. للظروف .. ايتهاوى

ولا اعيش شهور .. في ضيق .. وآنوف
في ليلةٍ .. فيها الفرح بي .. تزاوى

تدري .. متى تقهرني .. (الآه) و (الاوف)
لا ردّني ..زمرة صداها .. ( تقاوى )

ابطيت .. لا عايف .. ولاني .. بمعيوف
وحبّيت .. من باب الدلع .. والمخاوى

وعقب التفت .. وش صار بي .. من هوى نوف
حسّيت .. عمري .. راح فيها فداوى

انا .. مثل غمد العشق .. فارق سيوف
بموت .. لا من صرت .. ملجى وماوى

اشهق .. محبّة صادقة .. وازفر الخوف
وارعى فؤادٍ .. من هيامه .. تلاوى

قمر .. حصل له في دجى صدري .. خسوف
وما يطفي الرجّال .. غير المهاوى

في عرفهم .. زلّة عشاشيق .. وحلوف
وفي علمنا .. من معضلات .. الفتاوى

هذا .. وانا سوّيت .. بالناس معروف
لكنّ كوني .. في عيوني .. تساوى!


وسلامتكم :)

[أبـو إبراهيم]

حمد لله على السلامه



وصح لسانك


بس عاد هاه هالمره ماعاد نسمح بالغياب


بانتظارك

[أبو الوليد]

يا ليت انا مرّت .. على بعضي .. ظروف
يوم اني كلي .. للظروف .. ايتهاوى

الله الله الله الله

هذا .. وانا سوّيت .. بالناس معروف
لكنّ كوني .. في عيوني .. تساوى!


لكل هذا الشعر الحقيقي
شكرا
أستاذي أنت وصديقي

ماننحرم

[علي الخطيب]

ابو ابراهيم الله يسلمك يالغالي

وان شاء الله نستمر معكم يالغاليين

لك كل التقدير والاحترام

[علي الخطيب]

نايف الشنوان ..

انت استاذي ما حييت

والشعر الحقيقي ماهو الا نقطة من بحر ابداعك

الف شكر على مرورك واشادتك

لك تحياتي